İtaliyada yeni qəbul edilən qanuna qarşı bir sıra nümayişçi ölkə küçələrinə axışaraq etiraz aksiyası keçirib. Qeyd edək ki, bu qanun şirkətlərə işçiləri işdən azad etmək yönündə böyük səlahiyyətlər verib.

"Xeberinfo.com": Bu haqda “Deutsche Welle” yazır.On minlərlə italiyalı – istər dövlət, istərsə də özəl sektor işçiləri dekabrın 12-də ölkədə yaşanan iqtisadi böhran və iş yerlərinin azalması səbəbindən polis ilə üz-üzə gəlib.

Nümayişə çağırışı ölkənin ən böyük milli birlikləri olan CGİL, UİL və UGL liderləri edib. Ümumilikdə, ölkə ərazisində 50-dən artıq etiraz aksiyası keçirilib. Nümayişçilərin ümumi sayı isə 40.000-i keçir.

İtaliyanın ən böyük milli birliklərindən birinin lideri Maurisio Landini AFP-yə müsahibəsində, “Bu gün hər kəs Rentsi hakimiyyətinin qanunlarına qarşıdır”, – deyə bildirib.

Matteo Rentsi islahatların tətbiqində qətiyyətlidir

Yeni əmək islahatları baş nazir Matteo Rentsi ilə İtaliya xalqı arasında böyük uçurumun yaranmasına səbəb olub. Belə ki, 39 yaşlı Rentsinin yeni qərarı ilə işçi sayını azaltmaq istəyən şirkətlər artıq bunu daha rahat şəkildə həyata keçirə biləcəklər.

İtaliyada işsizlik həddi 40%-i ötüb. CGİL-in lideri Susanna Kamusso öz müsahibəsində “Hökumət yeni iş islahatlarını italyan xalqının əleyhinə yox, əksinə lehinə həyata keçirməlidir”, – deyə bildirib.

Bütün baş verənlərə baxmayaraq, Rentsi yeni islahatlarla bağlı qərarını dəyişmək niyyətində deyil. Belə ki, dekabrın 11-i TUrkiyədə rəsmi səfərdə olan Rentsi milli birliklərin etiraz haqlarını anladığını və buna tam hüquqlu olduqlarını bildirsə də, baş verənlərin onu planlarından çəkinməyə məcbur etməyəcəyini də söyləyib.

Qeyd edək ki, hazırda italyan hökuməti büdcə kəsrini azaltmağın və iqtisadi böhrandan birdəfəlik çıxmağın yollarını axtarır.