Azərbaycanda bər-bəzəkli, hay-küylü reklamla bazara girmiş "Kontakt Home” mağazalar şəbəkəsi mobil telefon alan müştərilərin başına olmazın müsibətlər gətirməkdə davam edir.

Yenixeber.org:  Bu məngənədə təkcə "Kontakt Home” mağazalar şəbəkəsi yoxdur. Onlarla Nəqliyyat, Rabitə və Yüksək Texnologiyalar Nazirliyi də əlbirdir.

Belə ki, "Kontakt Home” mağazalar şəbəkəsindən kreditlə mobil telefon alan müştəri bir müddət sonra onu istənilən telefon mağazalarının birinə verərək satır.

Ancaq bu zaman həmin telefonu qəbul edən dükan məhsulun "Kontakt Home”dan kreditlə alınmasından xəbərsiz olur. Bu telefonu mağazaların birinə satan həmin müştəri "Kontakt Home” firmasına olan kredit borcunu ödəmir.

Mağaza isə həmin telefonu başqa bir müştəriyə satır. Mağaza ilə bərabər telefonu alan müştəri də malın əvvəlki sahibinin "Kontakt Home” firmasına kredit borcu olduğunu bilmir.

Nəticədə bir müddət sonra kredit ödənişi edilmir deyə Kontakt Home” nazirliklə əlbir olaraq məhkəməsiz, xəbərdarlıqsız vətəndaşın aldığı həmin telefonu kredit gecikməsinə görə bloklayır.

Vətəndaş telefonu alarkən onun kreditdə olduğu haqda ona nə məlumat verilir, nə də imei.az saytına girərkən xəbər tuta bilir.

Belə bir cəncəllə qarşılaşan yüzlərlə alıcı var və nazirliklə "Kontakt Home” mağazalar şəbəkəsi məsuliyyəti bir-birinin üzərinə atmaqla açıq-aşkar fırıldağa yol verirlər.

Bu mövzuda BakuPost.az aylar əvvəl də vətəndaşların şikayətlərini işıqlandırmışdı. Amma nə problem həllini tapıb, nə bu özbaşınalığa son qoyulub, nə də şikayətlər azalıb.

Bu günlərdə redaksiyamıza müraciət edən vətəndaşlardan biri də analoji aqibətlə üzləşib. Onun sözlərinə görə, nazirlik və şirkət onun başına oyun açıb.

Müştəri 2014-cü ildə firmadan mobil telefon alarkən müqavilədə 600 manata qol çəkib. Sən demə, həmin mobil telefonu Bakıdakı telefon dükanlarının birindən alıb. Ancaq ona deyilməyib ki, telefonun ilk sahibi malı "Kontakt Home” dan kreditlə alıb və borcunu ödəmir.

Kredit ödəyicisi ödəniş etmədiyi üçün 3 il sonra həmin telefon koda salınıb. Hazırda yüzlərlə belə müştəri oxşar vəziyyətlə qarşılaşıb. Heç bir məhkəmə qərarı və bildirişi olmadan müştərilərin telefonları bağlanır.

Nazirlik öz səlahiyyətində olmayan bir ixtiyarı "Kontakt Home” firmasına verib və şirkət istədiyi vaxt həmin kredit borcu olan telefonları bloklaya bilir. Halbuki, firmanın belə bir hüququnun olması qanunsuzluqdur.

Adlarının çəkilməsini istəməyən mağaza sahiblərinin dediyinə görə, məsələlərlə bağlı şikayətlərə nə nazirlik, nə şirkət işə baxır: "Bu günə kimi 10 min belə telefon satılıb. Təsəvvür edin ki, dələduzluğun miqyası nə qədərdir.

Nazirlik də şirkətin oyununa şərik olub. Camaatın başına belə oyun açırlar”.

Yeri gəlmişkən, 2015-ci ildə telefonların IMEI kodlarını qeydiyyatdan keçirən imei.az saytı fəaliyyətə başlayıb. Amma bu haqda ictimaiyyətə məlumat verilməyib. Əgər telefonun kredit ödənişi varsa, bağlana biləcəyi haqda xəbərdarlıq həmin saytda qeyd olunmalıdır.

Çünki kreditlə telefon alan şəxs onu sonradan dükana və ya başqa birinə satır. Telefonu alan isə kredit borcunun olduğunu bilmir. Nazirlik də IMEI kodu bağlayır.

Nazirliyin işi o kodu qeydiyyatdan keçirməkdir. Amma koda məhdudiyyət qoymaq onun səlahiyyətində deyil. Bu məsələ məhkəmənin səlahiyyətindədir.

"Kontakt Home” mağazalar şəbəkəsinin Hüquq şöbəsindən BakuPost.az-a bildirildi ki, imei kod problemi nazirliyin səlahiyyətindədir və şirkətin heç bir məsuliyyəti yoxdur.

NRYT-nin mətbuat xidmətinə isə 2 gündür etdiyimiz zənglərə cavab verilmir.