Şair Saday Şəkərlinin həbsini Baş Prokurorluq təsdiqləyib.

Xeberinfo.com:   Prokurorluğun mətbuat xidmətinin yaydığı məlumatda deyilir ki, S.Şəkərli Vergilər Nazirliyinin vəzifəli şəxsinin müraciəti əsasında həbs olunub. Məlumatda vəzifəli şəxsin adı açıqlanmır. Lakin bildirilir ki, Baş prokuror yanında Korrupsiyaya qarşı Mübarizə Baş İdarəsinə şikayət edən həmin şəxs S.Şəkərlinin ondan barəsində kütləvi informasiya vasitələrində ifşaedici məlumatlar yayma hədəsi ilə pul tələb etdiyini göstərib.

“Araşdırmalar zamanı Bakı şəhər sakini Saday Şəkərovun külli miqdarda əmlak əldə etmək məqsədilə Vergilər Nazirliyinin vəzifəli şəxsi haqqında kütləvi informasiyavasitələrində ifşaedici, onu nüfuzdan salan, uydurma yazılar yazmaqla barəsində rüsvayedici məlumatlar yayma hədəsi ilə tələb etdiyi 10 min manat məbləğində pulualmasında şübhələr üçün əsaslar olduğundan faktla bağlı Cinayət Məcəlləsinin 182.3.2-ci (külli miqdarda əmlakı hədə-qorxu ilə tələb etmə) maddəsi ilə cinayət işi başlanmışdır.

S.Şəkərov iş üzrə təqsirləndirilən şəxs qismində cəlb edilərək, ona Cinayət Məcəlləsinin qeyd edilən maddəsində nəzərdə tutulan ittiham elan edilməklə məhkəmənin qərarı ilə barəsində həbs qətimkan tədbiri seçilmişdir.

Hazırda iş üzrə zəruri istintaq–əməliyyat tədbirləri davam etdirilir”, – deyə rəsmi məlumatda bildirilir.

***

Tanınımş şair Saday Şəkərli həbs olunub. Bu barədə “Azadlıq” qəzetinə şairin yaxınları məlumat verib. Məlumatda deyilir ki, dekabrın 22-də şairin tənqidi məzmunda olan “Qurd ürəyi” adlı romanı işıq üzü görüb. Dekabrın 23-də isə ona zəng vurub, Vergilər Nazirliyinə çağırıblar. Məlumata görə, nazirliyinin zəng edən əməkdaşı S.Şəkərliyə “sənə nə pislik etmişik, bizim adımızı hallandırmısan?” deyə irad da tutub. Vergilər Nazirliyinə gedən S.Şəkərlini isə orada Korrupsiyaya Qarşı Mübarizə İdarəsi və DİN əməkdaşları həbs edib. KQMİ-nin əməkdaşları Binəqədi rayon məhkəməsinin qərarı ilə şairin evində axtarış da aparıblar.

Şairə Cinayət Məcəlləsinin 182.2.3 – hədə-qorxu ilə tələb etmə, dəfələrlə törədildikdə, zor tətbiq etməklə törədildikdə (əmlakı müsadirə olunmaqla 5 ildən 10 ilədək azadlıqdan məhrum etmə ilə cəzalandırılır) maddələri ilə ittiham elan olunub.

Evində axtarış zamanı isə kitabları və notbuku götürülüb.

Yaxınlarının bildirdiyinə görə, dekabrın 24-də S.Şəkərlinin evində təkrar axtarış aparılıb. Onlar şairin “Qurd ürəyi” kitabının evdə qalan nüsxələrini də götürüblər.

Vəkil Bəhruz Bayramovun bildirdiyinə görə, evdə axtarış aparılarkən S.Şəkərli özü məhkəmə qarşısına çıxarılıb və maddəsi daha da ağırlaşdırılıb. Məhkəmə onu hədə yolu ilə xüsusilə külli miqdarda pul tələb etmə (eyni əməllər zorakılıqla törədildikdə) maddəsi ilə təqsirli bilərək, barəsində 3 aylıq həbs qətimkan tədbiri seçib. Şair məhkəmədə həbsinin siyasi sifariş olduğunu və buna etiraz olaraq aclıq aksiyasına başladığını bəyan edib.

Mövzunu diqqətdə saxlayacağıq.